Wol Auff Wol An (Oswald von Wolkenstein, Handschrift B, Lied 75 März 1418) --------------- Tenor Wôl auff wol An kind weib und man seyt wolgemüt frisch frölich früt Tanczen springen härpffen singen gen des zarten mayen garten grüne Die nachtigal der droschel hal perg ow erschellet zway gesellet Freuntlich kosen haimlich losen das geit wunne für die sunne küne Repeticio: Amplick hertte der geferte well wir meiden von den weiben ungestalt Mündlin schöne der gedöne macht und höne manigualt Raucha steudly lupff dich kreudly jndas bädly Ösly gredly Plümen plüde wendt uns müde laubes decke rauch bestecke mëczly Pring den buttern laß uns kuttren wascha maydly mir das schaidli Reyb mich knäblin umb das näblin hilfst du mir leicht vach ich dir das rëczly Jv heya haig zierlicher mayg scheub pfifferling die mauroch pring Menczsch loub und gras wolf fuxs den has hastu erfrewt die welt bestreut grünlichen Vnd was der winder uast hyninder in die mauer tieffer lauer het gesmogen ser betrogen die sein erlöst may dein getröst fröleichen Repeticio: Amplick hertte der geferte well wir meiden von den weiben ungestalt Mündlin schöne der gedöne macht und höne manigualt