Nu ist der küele Winder gar zergangen (Neidhardt von Reuenthal, 1190-1245)
=====================================

nu ist der küele winder gar zergangen
diu naht ist kurz der tac beginnet langen
sich heben ein wunneclîchiu zît
diu al der werlde vröude gît
baz gesungen nie die vogele ê noch sît
baz gesungen nie die vogele ê noch sît

komen ist uns ein liehtiu ougenweide
man siht der rôsen wunder ûf der heide
die bluomen dringent durch daz gras
wie schône ein wise getouwet was
dâ mir mîn geselle zeinem kranze las
dâ mir mîn geselle zeinem kranze las

der walt hât sîner grîse gar vergezzen
der meie ist ûf ein grüenez zwî gesezzen
er hât gewunnen loubes vil
bint der balde trûtgespil
dû weist wol daz ich mit einem ritter wil
dû weist wol daz ich mit einem ritter wil

daz gehôrte der mägde muoter tougen
si sprach behalte hinne vür dîn lougen
dîn wankelmuot ist offenbâr
wint ein hüetel um dîn hâr
dû muost ân die dînen wât wilt an die schar
dû muost ân die dînen wât wilt an die schar

muoter mîn wer gap iu daz ze lêhen
daz ich iuch mîner wæte solde vlêhen
dern gespunnet ir nie vadem
lâzet ruowen solhen kradem
wâ nu slüzzel sliuz ûf balde mir daz gadem
wâ nu slüzzel sliuz ûf balde mir daz gadem

diu wât diu was in einem schrîne versperret
daz wart bî einem staffel ûf gezerret
diu alte ir leider nie gesach
dô daz kint ir kisten brach
dô gesweic ir zunge daz si niht ensprach
dô gesweic ir zunge daz si niht ensprach

dar ûz nam sî daz röckel alsô balde
daz was gelegen in maneger kleinen valde
ir gürtel was ein rieme smal
in des hant von riuwental
warf diu stolze maget ir gickelvêhen bal
warf diu stolze maget ir gickelvêhen bal